كيفية حفظ الأعشاب والخضار الورقية خضراء وطازجة لاطول وقت ممكن

 -  44 مشاهدة

علشان تحافظون على الأعشاب سواء اللي شارينها من الجمعيه أو اللي حاصدينها من حديقتكم من انها تذبل وتصوفر لأطول فتره لا تحطونها بجانب أنواع الخضراوات والفواكه اللي تفرز غاز الاثيلين.. هذا الغاز هو هرمون طبيعي بالنبات مسؤول عن عملية النضج وعن الشيخوخه بالنبات.

بعض الأنواع تفرز الغاز بكميات كبيره حتى بعد ما نقطفها.. مثل التفاح والموز والطماط والمنجا وغيرها.. فإذا انتو حطيتوا الأعشاب بالثلاجة يم هالأنواع راح تشوفونها بسرعه ذبلت والأوراق اصفرت وما تصير تونس ابدا.. حاولوا تحطونها بعيد عنها.. ممكن تعزلونهم عن بعض باستخدام درج الثلاجه مثلا او تلفونها عدل بشي يعزلها عن المحيط داخل الثلاجه.

أنواع الخضار والفواكه اللي تفرز غاز الاثيلين وتكمل نضج بعد القطف يسمونها كلايمكتريك والأنواع اللي توقف نضج وما تفرز غاز الاثيلين يسمونها غير كلايمكتريك.

انا احب احط باقة الأعشاب اللي حاصدتها فريش من الحديقه بمزهريه فيها شوية ماي وهالشي راح يخلي أوراق الاعشاب نضره ومنتعشه وشاتره مده طويله بالمطبخ واظل استخدمها فريش.. انتو شلون تحافظون على الأعشاب لأطول فترة ممكنة؟


كيفية حفظ الأعشاب والخضار الورقية خضراء وطازجة لاطول وقت ممكن

مصدر النص والصورة: grow_it_green



ادعمنا